قارغيش

بولگه لر سرويسي: -آخي نه‌دن کيمسه اورا گئتمير؟ نييه اورا مسافر آپارميرسيز؟. . .

ويدا حشمتي

 بيرنجي بولوم

بولگه لر سرويسي: -آخي نه‌دن کيمسه اورا گئتمير؟ نييه اورا مسافر آپارميرسيز؟. . .
بونلاري دئييرکن، گنج اوغلاني قانع ائتمه‌يه چاليشيرديم. او، اوزونو منه چئويريب، سويوق باخيش ايله جواب وئردي:
-هلبت بير شئي وار کي، هئچ کس اورا گئتمير!. . قرار دئييل هر شئيي ديله گلک کي!. . . واز کئچ خانيم، واز کئچ!
منيم اومودلاريم يئني تومورجوقلانميشدي. نييه واز کئچه‌يديم؟. . ايللردير بو گونون حسرتيني چکميشديم. بئينيمده خياللار بسله‌ميشديم. ايرمي ايل گؤزله‌ميشديم بو گونو.
-آغا! سن نئچه ايسترسن من وئره‌جم. دئييرسن ايکي-اوچ قاتيني وئريم. ايسترسن دولار وئره‌رم.
پاسپورتومون آراسيندان دولارلاري چيخارتديم، اونا ساري توتدوم.
گنج اوغلان باشيني آشاغا ساليب، باشماقلارينا باخار کيمي دوشونجه‌يه دالدي. بيردن قرارلي بير لحن‌له دئدي:
-کئچ اوتور!. . .
سئوينجدن دئديم:
-سن آللاه؟ دوز دئييرسن؟. . .
-کئچ اَيلش! آخيردا، مني اوزدن آپاردين.
فلاسکدان باشقا، هر نه اليمده واريدي؛ آرخا صندلين اوستونه قويدوم. اؤزوم ده قاباقدا اوتوردوم. ايسته‌ييرديم هر طرفه ديقتله باخام. سسسيزليک ايچينده، ماشيني سورن اوغلانين قولونداکي دؤيمه‌يه، گؤزوم دوشدو. اوزو اولمايان بير قيزين شکلي ايدي. آلتيندا دا لاتينجه دنيز يازميشدي. بير سؤز سوروشماق ايسته‌ديم. سونرا اؤزومه دئديم، حتما سئودييي بيريدي. ايندي ماراقلانماق زاماني دئييل.پاييزين سويوغو جانيمي اوشوتدو. شوشه‌ني اوسته چکديم. يول قيراغينداکي کوللار، کوله‌يين موسيقي‌سي ايله اويناييرديلار. سانکي کؤکلريندن قوپوب، اؤزلريني يئلين الينه وئرمک ايسته‌ييرديلر. کوللارا ايليشن نايلونلار، ياپيشقان کيمي ياپيشيب، سئويلمه‌ين بير گؤرونتو ياراتميشديلار. بو گؤرونتو مني چاشديريردي. اوزون زامان ايدي دوغانين تر-تميز گؤرونمه‌يينه آليشميشديم. اورالاردا دوغانين چوخ اؤنمي واردير. هرکس بير گؤره‌ولي کيمي دوغادان موغايات اولار. اوزومو چئويريب گنج اوغلانا ساري دؤندوم.
کؤيکسومو اؤتوروب، دئديم:
-ايتيک چوخ پيس اولار! آدامين گؤزو دايما آرخاسيندا اولار‌. . .
بارداغي چاي‌لا دولدوردوم. اوغلان ايستک‌سيزجه بارداغي آلدي. آغزيني بيچاق آچميردي. ظن ائديرديم کي، «نه ايتييي؟» سوروشاجاق. من ده دانيشماغا باشلاياجاغام. آمما داشدان سس چيخدي، اوندان سس چيخمادي. دوز، باشي‌نين اوستونده بير شکيل واريدي. ايکي کيشي ماوي بير ميني‌بوسون اؤنونده دورموشدولار. بو شکيل ماشينين گونلويونه(سايه‌بانينا) ياپيشديريلميشدي.
عمي جانين ماوي ميني‌بوسو ياديما دوشدو. او زامانلار اونا قاپدي-قاچدي دئيرديک. هر ايل يايدا بوتون عاييله ماوي قاپدي-قاچدييا دولوب، اورا گئدرديک. اوخويارديق، اوينايارديق. دئييب-گولمک ديزدن اولاردي. بير دببه سو، بير بؤيوک خيار گؤتوروب، ساحيله گئدرديک. هردن بير تويوپ کيرايه ائديب، داليميز اوسته اوزانارديق. گونشين جيزلاماسي بير ياندان، گؤلون شور سويو بير ياندان. . . اوزوموز يانيب، آجيشاردي. قابيق قويارديق. قاپ-قارا اولارديق.
او گون ساحيلده عمي قيزيملا گزيرديک. آغ کؤينکلي، قارا ساچلي بير گنج منيم ايلگيمي چکميشدي. اوزون-اوزون باخيشميشديق. عمي قيزيما اشاره ائتدييمده، گولموشدوک. عمي قيزيم ياواشجا قولاغيما ميزيلداميشدي: «قيز اونون يولداشينا دا من وورولموشام». گون باتيميندا ساحيلده گزيشيب، هاوا قارالينجا چاديرلارا چکيلرديک. گئجه باشلاناندان، چالقي‌چيلار چالماغا باشلاردي. هامي اونلاري چنبرله‌ييب، چپيک چاليب، اوخويوب-اوينايارديلار. بو چال-هاي گئجه ياريلارينا دک سورردي. سونرا چاديردا داراشليق ايچينده، ديب-ديبه ياتارديق.
شفق‌ سؤکولن چاغ، عمي‌قيزيملا گيزليجه چاديردان چيخيب، اونلارلا ساحيلده دولانيب، گونشين دوغماغيني سئير ائدرديک. بير هفته سره-سر اوردا قالارديق. ائوه قاييتماغيميز گلمزدي.
اوزون زامان ايدي نامه گؤزله‌ييرديم. عمي‌مين اوغلو اولماديغيندان، عمي قيزيم مندن داها راحات ايدي. اونلارين ائولري‌نين آدرسيني وئرميشديک. نئچه سئري عمي قيزيمي گؤره‌نده سوروشموشدوم، آنجاق نامه گلمه‌ميشدي. بير گئجه ننه‌م گيلين حيه‌طينده، توت آغاجي‌نين آلتيندا يئر ساليب، ياتميشديق. عمي قيزيم ياوشجا يورغانين آلتيندان ايکي پاکات چيخارديب، گؤيده اويناتدي: «قيز آيدين‌دان نامه گليب» دئدي. «منيمکي ده بوداهااااا. »
قولونو محکم قيرتديم:
-به ايندي نييه دئييرسن؟. . .
هايي گؤيه گئتدي.
ياواشجا صانديقخانايا گئديب، گيزلي‌جه نامه‌ني اوخوماغا باشلاديم. بير اوندا ننه‌م گليب، دئدي:– توو اوزووه باااا. . . او اوغلاندان کاغيذ گليب؟
باشيمدان بير قازان قاينار سو تؤکدولر سانکي. دئمک بيزيم گيزلي-گيزلي باخيشمالاريميز-دانيشمالاريميز ننه‌مين گؤزوندن قاچماميش‌ميش. دوزدو آيديني آتاما آنلاتدي، چوخ ايشلرين باعثي ننه‌م اولدو، آمما نامه‌لرين آردي-آرخاسي کسيلمه‌دي. بيرينده يازميشدي« سنين عشقيوه سرباز گئتديم».
کوردوستاندان، ساواشين توفه-توفونده بئله، نامه يازاردي.
هميشه او گونلري خاطيرلاياندا، اوره‌ييمه داريخما گلر. گؤزومو يولدان چکمه‌دن ياواش سسله دئديم:-بيليرسيز!؟ من بيريني آختاريرام. ايللردير اونو گؤرمه‌ميشم. اؤلکه‌ني ترک ائتمه‌يه مجبور اولدوغومدان.اوغلان ديققتيني يولدان چکمه‌دن دئدي:-نييه اؤلکه‌ني ترک ائتديز کي؟. . .
نئجه جواب وئره‌جه‌ييمي دوشوندوم. درين بير کؤيکس اؤتوروب، دئديم:
-او زامانلار باشقا جور دوشونوردوم. ايده‌آللاريم واريدي.
اوغلان سؤزومو آنلامايان کيمي قاشلاريني يوخاري آتدي.
-کيمي آختاريرسيز؟ تانيش‌دير يا قوهوم؟
-اسکي بير دوست.
-باخ خانيم! اورالار چوخداندي ويران‌دير. کيمسه ياشامير آرتيق.
اوغلانين سؤزونو سايمادان، بئينيمده آيديني خيال ائتمه‌يه چاليشديم. يقين، داها ساچلاري قارا دئييل. . . بلکه ده گوموشو ساچلاريني، گئنه آرخايا داراييب، بيغلاري دا اوست دوداغيني اؤرتوب. بلکه ساققالي وار. . . بلکه ده ساچلاري تؤکولوبدو. سونرا واز کئچديم. اونو گؤردويومده نه دئيه‌جه‌ييمي، ساپا دوزومه‌يه باشلاديم. «منه يازديغين سون نامه‌ني ازبرم آيدين! مني باغيشلا! عمي قيزيم هر شئيي يازميشدي منه. منيم اوچون قاپيميزا کيمي گلميشدين. آنجاق من. . . ».
توز دنه‌لري ماشينين شوشه‌سينه دَييب، سس وئردي.
گنج اوغلانين سسي مني اؤزومه گتيردي. گؤزلريني اؤنه ديره‌ميش، دئدي:
– بورالارا سانکي لعنت ياغيب، سانکي دنيزين قارغيشي توتوب. . .
بير شئي زلي کيمي بئيينيمي سومورور. نئچه ساعات اؤنجه‌کي اومود تومورجوقلاري سولماغا باشلاييب. گونشه داريخميشام. آخي هميشه بولودلو هاوا اوره‌ييمي سيخار. بير زامانلار بو يوللاري سره-سر گونه باخانلارين تارلاسي بزه‌ميشدي. گؤز ايشله‌ديکجه گونه‌باخان اولاردي. ايندي هئچ بيريندن خبر يوخدو.
-آغا باغيشلايين آديز نه‌دير؟
ماراقلا سوروشدوم.
– منه فايتونچي دئيين.
-چوخ جالبدي. آتا-بابالاريز فايتونچي ايديلر.
-هه ائله‌دير. اونلار مسافرلري فايتونلا آپارارديلا، من‌سه ماشين‌لا. بؤيوک، بؤيوک بابامين اوچ دنه فايتونو واريميش. ياخشي کئچينرديلر. اونون دا دده-باباسيندان قالميشدي بو ايش. آتامين دا ميني‌بوسو واريدي.
باشيمي ترپه‌ديب، باشي‌نين اوستونده‌کي، عکسه بير داها باخديم.-آغاي فايتونچي!. . . گونه باخانلارين باشينا نه گليب؟. . . بورالار گونه باخانلارلا دولو اولاردي بير زمان.
-آللاه اونلارا رحمت ائله‌سين. چوخداندي اؤلوبلر. هاواني گؤرموسوز؟. . . بو هاوادا نه گونه باخان اولار نه باشقا شئي. . .
کؤيکسومو اؤتوردوم. آرتيق گؤزل شئيلردن اثر يوخويدو.
کولک بيراز ياتميشدي. داغلارين اورتاسينداکي گديکدن کئچيب، دوز يولا دوشدوک.
آردي وار

منبع :