سئودا (پووئست)
سئودا (پووئست)
1400/08/16
آناديليميز: بيردن خانيمتاج خانيمي گؤرور. ديليندن قناري‌يه آسيليبدي. ديلي ياريم آرشينجا ائشيگه چيخميشدير. اونون گؤردوکده، خانيمتاج خانيم ال آياق چاليب چيرپينير. حاج اکرم خانيم سوروشور:
نريمان ناظيم
آناديليميز: بيردن خانيمتاج خانيمي گؤرور. ديليندن قناري‌يه آسيليبدي. ديلي ياريم آرشينجا ائشيگه چيخميشدير. اونون گؤردوکده، خانيمتاج خانيم ال آياق چاليب چيرپينير. حاج اکرم خانيم سوروشور:
– بورا هارادي خانيمتاش، سن نه ائله‌ييبسن؟!
خانيمتاج خانيم جاواب وئره بيلمير، تکجه آغلايير. گؤزلريندن ياش يئرينه قان گيله‌لنير.حاج اکرم خانيم يئني‌دن سوروشور:
– بورا هارادي، دئ گؤروم سني نييه آسيبلار؟
خانيمتاج خانيم يئنه ده آغلايير. بيردن کيميسي اونون قولوندان ياپيشيب مهريبانجاسينا دئيير:
– او قئيبت ائله‌ييب قيزيم.
حاج اکرم خانيم اوجا بوي بير قادين گؤرور. ياشيل نورلا هاله‌لنميش بنيزيندن ايشيق ساچير. حاج اکرم خانيم اؤرکله‌نير، ديلي توتار – توتماز سوروشور:– بس، او بيري‌لر؟ ساچيندان آسيلانلار؟
جاواب ائشيدير:– اونلار ساچلارين نامحرمه گؤستريبلر، او بيري‌لري ايسه ارلريندن اجازه‌سيز بير يئره گئديبلر.حاج اکرم خانيم تير- تير اسه‌رک اينله‌يير:– بس من؟ مني نئيلييه‌جک‌سيز؟
نوراني قادين: «اينديدن بيلينمز، هله سنين واختينا قالير»- دئيه، بير قاپيني آچير اونو ائشيگه بوراخير. حاج اکرم خانيمين گؤزلري قاماشير. ياواش ياواش اؤزون تاپير. هند‌ه‌وره باخير، تانيشدي. سئچير. اؤز مسجدلري‌دي، امامزادا مسجدي‌نين حيطي‌دي. شيخ مفيدين سسي بلندگودان ياييلير. او اينجارسيز حالدا دووارين ديبينده اوتورور. سس ائشيديلير:
– آنالار، باجيلار، ارسيز قالانلارين سايي – حسابي يوخدور. يئتيم اوشاقلار آتا ايسته‌ييرلر. ايثار ائلمه‌لي گوندور. ايمکاني اولانلار بونلاري قانادلاري‌نين آلتينا چکسين‌لر. آغالاريزي تشويق ائله‌يين بو خئير ايشه قول قويسونلار. راضي اولمايين جاوان باجيلاريميز بي‌صاحاب قالسينلار. روا بيلمئيک بير پارا مسائلي خداي نخواسته جامعه‌ده وجوده گله کي صاباحکي گون قيامتده جوابگو اولا بيلمه‌يک…
حاج اکرم خانيم يئنه ده ائوده‌دي. شکوفه خانيم اوتوردوغو يئرده اوتوروب هله ده دانيشير:
– گينه ده واللاه آلله شيخ مفيدين آتاسينا رحمت ائله‌سين. اقلليکم بيزه بير قاچاق يولو قويورو. ايسراغي گون زيور خانيما دئييرديم، دئييرديم گلين هاميليغان تصميم توتاخ ارلريميزه دئيک گئتسين‌لر آداما بيرين آلسين‌لار. باخ بيري من واللاهي سيزدن بئليم باغلي اولسا لاپ گونو صاباح حاج احمدينن دانيشارام. قيز ايندي کيمده داي ار نازي چکمه‌يه حوصله قاليب. قوي گئتسين‌لر بلکه باشلاري قاريشا اؤزلرينه، بيز ده قول قيچيميزي اوزاداق بير راحات نفس چکک آخي!شکوفه خانيم ياواش- ياواش دومانا بورونوب يوخا چيخير، آمما »بير راحات نفس چکک!« جومله‌سي هرله‌نير، هرله‌نير دؤنه – دؤنه گئديب در- دووارا ده‌ييب حاج اکرم خانيمين قولاغينا قاييدير…
قاپي‌نين او اوزونده باجيلار هله ده دانيشيرلار. حاج اکرم خانيم فخري‌نين سؤزلرين سئچير:
– آنجاق گون او گون اولدو کي فروغ ايلا قاسيم آغا گئتديلر »شمسي«ني گتيرديلر. بير ايکي هفته ائله بير سؤز سوو يوخ‌ايدي. بيزده چوخ آز گيت گل ائديرديک. آمما ياواش ياواش آبا‌نين عوالمي ده‌ييشيلدي. ايندي آرالاريندا نه گئچميشدي بيلميرم آنجاق…. ائله آرواد…. سسين چيخارت….هئچ اوولدن…. ائو…. قاسيم آغا…….
گئتديکجه فخري‌نين سؤزلري حاج اکرم خانيمين عالميندن آرا آچير، سؤزلر سئيره‌لير، بيري ائشيديلير، بيري ائشيديلمير. يئني‌دن اويغويا دالير. بو دؤنه اؤزون مطبخده گؤرور، لپه آريدير. هيرسي باغيرساغين کسير:
– آخي هرشيين بير حددي وار. يوخو اولار بير ساعات، ايکي ساعات. ناهاري تيخيب ياتيبلار. باخ اورا سني الله، گون باتير ها! به بو کيشي دوکانا گئتمه‌يه‌جک؟…باشيني يوخاري قووزوياندا گؤرور شکوفه خانيم قاپي‌نين آغيزيندا دايانيب. ديکسينير. سوروشور:– شکوفه خانيم سن هاياننان گلدين؟!شکوفه خانيم گولور. آغيزيندا هئچ بير ديشي يوخدور. گؤزلري آلاجا – بيلاجا چالير. آنايين بير آدامدير سانکي. يوخ، «بو شکوفه دئييل» – دوشونه‌رک سوروشور:
– سن کيمسن، هاردان گلدين بورا؟
آرواد يئني‌دن گولور:
– بوشلا بو سؤزلري آي بيناوا بدبخت! دور آياغا، دور گيت اوسته، گؤر اوردا نه خبردي؟ دور!آرواد قاپي‌نين قاباغيندان چکيلير. حاج اکرم خانيم لپه خونچاسين يئره قويوب قالخير. قاپي‌نين او تاي بو تايينا باخير، آروادي گؤرمور. حيطه چيخير. آرواد يوخ اولوب. اوره‌يي دؤيونمه‌يه باشلايير. رنگي قاچير. حيط قاپيسينا گلير. قاپي باغليدير. دالاندا اوست اوتاغين پيلله‌سي‌نين قاباغيندا بير نئچه لحظه دوروخور. يئني‌دن آروادين سسين ائشيدير:– چيخ اوسته. چيخ گؤر نه ائليرلر؟
بو سسين اؤز سسينه اوخشارليغيندان شاشير:
– قيز من اؤز اؤزومه دانيشيرام؟!سس گلير:– سفئه دانيشما آرواد، چيخ اوسته دئديم. چيخ! اورا باخ! يئنه داياندي ها! اي آوارا کولباش!اوول پيلله‌ني چيخير. دوروخور سس گلير:
– نه‌يه دوردون بس؟يئنه ده بير پيلله چيخير. اوره‌يي چيرپينير. بارماغي اوسته يئرييير. هر پيلله‌ني چيخديقجا دايانير قولاق آسير. او تاي بو تايا باخير. هله بئش آلتي پيلله قالير. اوره‌يي‌نين دؤيونتوسونو ائشيدير. قورخو جا‌نينا چؤکور. ايسته‌يير قاييتسين. بارماغين ديشي‌نين آراسينا آليب سيخير. آرخاسين دووارا سؤيکه‌ييب توختاقليق ديله‌يير. بير ايکي پيلله ده چيخير اوسته. اوچ پيلله قالير. ديزه چؤکور. ديرسه‌يين آخيرينجي پيلله‌يه سؤيکه‌يير. اينجارسيز حالدا دايانيب قالير. اوره‌يي کؤکسونده چابالايير. دؤشونو پيلله‌‌نين تينينه سيخديقدا باشيني قول‌لاري‌نين اوستونه قويوب نفسين اوغورلايير. اوتاغدان خيسين – خيسين سسلر گلير. شمسي‌‌نين نارين – نارين گولوش سسي کسيلمير. هنيرتي ايچينده حاجينين بوغوق سسي هردن بير ائشيديلير. حاج اکرم خانيم وحشتله بويانميش نيفرته قاپانير. بير لحظه قاپيني آچيب ايچري گيرمک ايسته‌يير. شمسي‌‌نين يولوناجاق کيلکه‌سيني جايناقلاريندا حيس ائله‌يير. قجيرديغي ديشلري‌نين آراسيندا چئينه‌نه‌جک اتين دادين دويور. آغيزينا دولاجاق قا‌نين شورلوغون تامسينير،… کيميسي‌نين تنگه ده سسله‌نن سسي‌ايله در حال قاييديب سورعتله پيلله‌لري يئنير. آرخاسينجا اوتاغين قاپيسي‌نين آچيلماسين حيس ائله‌يير:– ده‌دم واي گؤردولر مني. حاجينين اؤزويدي، گؤردو. ائويم يئخيلدي منيم. واي!
دوشونه – دوشونه حيط قاپيسيني آچيب تنگه‌يه قاچير. تنگه‌ده کيمسه گؤزه گؤرونمور. نئچه دقيقه اوتاي بوتايا قاچير. نئيله‌ديگيني بيلمير. بيردن باش آچيقليغيني دويور. چاديراسين گؤتورمگه يئني‌دن ائوه قاييدير. ايچري گيرجک تعجب‌دن گؤزلري بويويور: حيط آدامدان قيمبيلدايير. حاج اکرم خانيما يول آچيرلار. کئچير گئديرحيطين اورتاسيندا دايانير. وحشتدن بؤيوموش گؤزلريله اونو دؤره‌له‌ين جماعته باخير. باخيشلاردان ياغان نيفرت اوخو اوره‌يينه سانجيلير. هامي تانيشدي: قوهوم- قونشو، ائل – فاميل. بيردن بيره فروغ شيهه چکه‌رک جماعتي ياريب اونا ساري شيغايير:– اؤلدوردون آتامي نااينصاف،… ديغلاتدين آاجاني،… ديغلاتدين
حاج اکرم خانيم مطبخه ساري قاچير، بدري اوردا اؤزون بوداماقدادير. اوز – گؤزون ديديب داغيديب، ساچلارين يولوق – يولوق يولوب خرمن ائله‌يير.گئري قاييدير. تنگه‌يه ساري قاچير. دالاندا مير آغايلا اوزلشير. نئچه نفرايله بيرليکده حاجينين جنازه‌سين پيلله‌دن آشاغي گتيريردي. ميرآغا اوندان اؤز چئويرير. جنازه‌‌نين آردينجا گئد‌ه‌ن فخري مزمت ائديجي باخيشيلا اون سوزور، بير سؤز دئمه‌دن سوووشوب گئدير. جنازه‌ني آمبولانسا قويورلار. مينن مينير، يئرده قالان ايسه باشقا ماشينلاريلا يولا دوشوب آمبولانسين داليجا گئديرلر. حاج اکرم خانيم آغلايا – آغلايا آمبولانسين دالينجا قاچير، اونا يئتيشه بيلمير. کيمسه اونو ماشينينا مينديرمير. هانسي ماشينا مينمک ايسته‌يير، اونو نيفرتله دالا ايته‌له‌ييب يولا دوشورلر. حاج اکرم خانيم ساچلاريني يولا- يولا ائوه قاييدير. ائوده کيمسه قالماييب. او چاديراسي‌نين دالينجا ائوي گزير. آلت اوتاغا گيرجک اورادا شمسي‌‌ايله قاسيمي قول – بويون گؤرور. نيفرتدن شيهه چکيب اونلارا ساري يوگورور.ايکي باجي آنالاري‌نين باغيرتيسي‌لا يئرلريندن سيچيرايب اؤزلرين حاج اکرم خانيما يئتيريرلر. حاج اکرم خانيمين وحشتدن بؤيوموش گؤزلري تاي با تاي اولوب تاوانا ديرنميشدي. فخري آناسين سيلکه‌له‌ييب ديکلدير؛ ميتککه‌يه سؤکه‌يير.
منبع :