وجودو اوچدو

بولگه لر سرويسي: ترافيک ايشيغي قيرميزي ايدي. پيادا کئچيشي داليندا دوردو. دال‌با‌دال سيقنال سسي خياباني بوروموشدو. بير موتور‌سيکلت کوکرويه-کوکرويه دوز قيچ‌لاري‌نين قاباغيندان يئيين کئچدي. هورکوب دال‌دالي گئتدي.

ريحانه پورغني

بولگه لر سرويسي: ترافيک ايشيغي قيرميزي ايدي. پيادا کئچيشي داليندا دوردو. دال‌با‌دال سيقنال سسي خياباني بوروموشدو. بير موتور‌سيکلت کوکرويه-کوکرويه دوز قيچ‌لاري‌نين قاباغيندان يئيين کئچدي. هورکوب دال‌دالي گئتدي. آز قالا آرخا دوشوردو. قادينا باخان گنج موتورسيکلت سوروجوسو دؤنوب، کوبود سسله برکدن گولدو. اوغلانين ناتاراز گؤزلريندن ساچان قيغيلجيم‌لار قادينين اوزونو يانديردي. آجيقلي باخيش‌لاريني اوغلاندان آليب، سوروشوب چيگين‌لرينه دوشن شاليني تيترک ال‌لري‌ ايله باشينا چکدي. موتورسيکلتين اگزوزوندان چيخان توستو گؤزونون قاباغيندا قارا بير بولود سره‌له‌ميشيدي. نئچه آدديم اوتايدا دوران اوزون قارا مانتو گئين، قيريشميش اوزو شسلي قامتينه ياراشمايان قادين؛ »بالا بيرزاد اولمادي کي؟« سوروشدو. -يوخ- دئيه باشيني ترپتدي.
-»اولسون قورخما قيزيم، کؤپک اوغلونون آرپاسي آرتيق دوشوب« دئدي.
ياشيل ايشيق يانير، ماشين‌لار آغ چيزگي‌لرين داليندا دوزولورلر.قيچ‌لاري دالينجا سورونه_سورونه خياباندان کئچير. يان گزينتيده ماراقلا ويترين‌لره باخان، يار-يولداشي ايله آدديملايان، سرعتله ايش-گوج‌لري‌نين دالينجا گئدن جماعتين آراسيندان يول تاپيپ کئچمه‌يه چاليشيردي. قادين ساللانا_ساللانا قارا بير کؤلگه کيمي او رنگلي جماعتين ايچيندن کئچيب گئديري.هاوانين بورکوسوندن نفسي داراليردي. تر آلنيندا مونجوقلانميشدي. ديلي داماغينا ياپيشميشدي. بير ميوه سويو ساتان دوکانين قاباغيندا داياندي. رنگ‌به‌رنگ ميوه سولاري يئکه شيشه قاب‌لاردا فيرلانيردي؛ ماوي، ياشيل، قيرميزي. جماعت دوکانين قاباغيندا سيرا باغلاميشدي.
گؤزو رنگ‌به‌رنگ ميوه سويو بارداغيني دونيانين ان قيمتلي وارليغي کيمي الينده توتان، قيرميزي کورده‌له ايله باغلانان قوشا هؤروک‌لري چيگين‌لري‌نين اوستونه دوشن، قيرميزي گوللو دون گئيينَن بير بالاجا قيزا ساتاشدي. دونيانين ان موتلو اينساني‌نين گولوش‌لري دوداغيندا اولان بالاجا قيز آناسي‌نين اليندن ياپيشيب اورادان اوزاقلاشدي. قادينين بئينينده کولک اسدي. او کولَگين جان يانديران شاختاسي، يايين اورتاسينداکي او ايستي، بورکولو آخشامدا قادينين ال‌لريني، اوزونو، توم وجودونو بير پارچا بوزا دؤندردي.گؤزلري‌نين قاباغينا بير تور چکيلدي، آياق‌لاري دولاشا_دولاشا دوکانين قاباغيندان کئچيب گئتدي.بير کوچه‌يه دؤندو. دوز بير آي بوندان قاباق بو کوچه‌نين اؤنوندن کئچنده، شانسدان دؤنوب کوچه‌نين ايچينه باخاندا، گؤزو بير دکتر اوفيسي‌نين پانئلينه ساتاشميشدي. »دکتر اکرم افشارنيا، متخصص بيمارهاي زنان و زايمان« تعجب‌لنميشدي. اؤز اؤزونه »بو دکتر بو خلوت، سس‌سيز کوچه‌ده نه ايش گؤرور؟« دئميشدي. کوچه‌ده بير الکترونيک جيهازلار اعمالات خاناسي، بير وکيل اوفيسيندن باشقا بير ايش يئري يوخويدو. قالاني کپنَگي باغلي قيفيل‌‌لاري پاسلانميش دوکان‌لار ايديلار. هئچ بيلميردي روزگار اونا نه يوخو‌لار گؤروب کي دوز بير آي سونرا او دوکتوره ايشي دوشه‌جک.
اوفيسين قاباغيندا داياندي. گوجله نفس آليردي. دليجه‌سينه چيرپينان اوره‌گي آز قاليردي باغيريني دلسين. ال_آياغي سوستالميش، يئرينده دونوب قالميش، تون‌لارجا آغريليقدا اولان آياق‌لاريني گوجله ترپَديب، سورونه-سورونه ايچَري گيردي.ديوارلاري بوز رنگله بويانميش بوغاناق، داريسقال، داخمايا بنزر اوفيسده سکرتر باشقا کيمسه يوخويدو. نارين گؤزلو، سيسقا سکرتر، قاديني گؤرمک همن دوداغي قاچدي.
-»هن بس گلدين! دونن پئشمان‌لاييب گئتمه‌سَيدين ايندي جانين قورتولموشدو. پول گتيردين؟ نقد اولاها گرک، بيليرسن دا بو ايش‌لرده گرک ديوان-دفترده اؤزوندن ايز قويماياسان« دئدي. قادين اؤيولدويه-اؤيولدويه توالته ساري قاچدي، ايچي ديشينه چيخا-چيخا، توم نفرتيني و اکراهيني قوسدو. بيرآن ال اوزونه سو ووراندا، گؤزو آينادا قارالميش، روحسوز، ازگين صيفتينه ساتاشدي. گؤزونو آيندان آليب تئز ائشيگه چيدي.-»قورخورسان؟ قورخما هئچ زاد دئييل، اون دقيقه‌يه قورتولار، اما نَيه تک گليبسن؟ بير نفري اؤزونله گتيرَردين کاش« سکرتر دئدي. قادين بير سؤز دئمه‌دي، بير دسته پولو چيخارديب ماسانين اوستونه قويدو. منشي آغاج کيمي قورو ال‌لريني اوزاديب پول‌لاري گؤتوروب سايماغا باشلادي.
قادين سکرترين ايزنيني گؤزله‌مه‌دن دوکتورون اوتاغينا کئچدي.دوکتور باشيني موبايليندان قالديريب، قادينا باخاراق:
-بوگون امين‌سن دا هن؟ سکرتر دئييردي دونن قويوب گئديبسن. ايسته‌ديگيم سونوگرافي‌ جوابيني گتيردين؟
قادين اليني آتيب بير کاغاذ چيخارديب دکترا ساري اوزادير. دکتر گؤزلوگونو تاخيب کاغاذا باخاندان سونرا، »ياخشي هر شئي يولوندا، گتير تانسييونون اؤلچوم باشلاياق« دئيير.
-ياخشي‌دير، کئچ سويون او تختين اوستونده اوزان؛ دکتر دئيير.قادين دؤنوب او بدهئيبت، ايشکنجه تختينه اوخشايان رنگي گئتميش ايکي قيچ يئري اولان اورتاسي بوش تخته باخدي. مذبحه‌يه گئدن قويون کيمي باشيني آشاغي ساليب تخته‌ساري گئتدي.
جيهازيني سويوقلوغون ايچينده حيس ائتدي، آغري بير ايلان کيمي توم بدنينه دولاشدي. هر يئري آغريدي. بدني آغريدي. بئلي آغريدي. اوره‌گي آغريدي. روحو آغريدي. ديش‌لريني بيربيرينه سيخيب، گؤزلريني برکدن يومدو، ديرناق‌لاريني تختين قولونا باتيردي. اما سسي چيخمادي. دستگاهين سسي بئينينه تؤرپو چکيردي. بطنيندن چيخان لخته لخته قان بير خورتومدان کئچيب جيهازين محفظه‌سينه تؤکولوردو. ائله بيل قادينين گؤوده‌سيندن بير شئي اوچوب گئتدي. قادينين رنگي سارالميش، آياق‌لاري تيتره‌ييردي. اوشويوردو. اورَگي بولانيردي. قادين اؤلمک ايسته‌ييردي.
-قورتولدو، دورما آياغا بيراز بوردا اوزان تانسييونون ائنيب، ايندي سکرتره دئيه‌رم بير سرم وورار؛ دکتر دئدي.قادينين يانيداکي کيچيک ماسادان تلفنونو گؤتوروب باخدي. بئش جوابسيز زنگ. تلفن يئنه چالدي. توشا باسيب آچدي. بير بوغوناق، کوبود کيشي سسي اوتايدان:»نئينه‌دين؟ بو گون ايشي قورتاردين يا يوخ؟« دئدي.
-دئديگيني ائله‌ديم، اونو اؤلدوردوم؛ قادينين سسي تيتره‌يه-تيتره‌يه، کينله دئدي. ياواش-ياواش گؤزلري يومولدو.گونشين آلتيندا آلتين کيمي پاريلدايان اوجسوز بوجاقسيز بير بوغدا تارلاسي‌نين اورتاسيندا دايانميشدي. ايکي قولونو ايکي ياندان آچيب دوردوغو يئرينده اؤز اطرافيندا فيرلانيردي. بيردن گؤيون بير قاتيندان بير قارا قارغا گليب سول چيگنينده اوتوردو. قادين ترپنمه‌دي، قارغا اگيليب وار گوجويله ديمديکله‌يه-ديمديکله‌يه قادينين باغريني دليب، چيرپينان اؤره‌گيني سؤکوب، قاني سوزوله-سوزوله ديمديگنه آليب، اوچوب، گؤيده يوخ اولدو.
قادين هر زامان کي کيمي يئنه ده سوسدو. بوم‌بوش جانسيز، آيازلي گؤزلريني، سئرچه‌لره زيلله‌دي. سئرچه‌لر هورکويوب پيريلداييب اوچدولار. قادين اَگيليب بوم‌بوش قالان باغرينا باخدي. قارنيندان بير توتام سامان چيخارديب، اورَگي‌نين بوش قالان يئرينه باسدي.

منبع :