گؤي قورشاغي

گونون اورتا چاغيدير. ياز ياغيشي شيديريغي ياغير. تله‌سرک ائوه گليرم. اوست-باشيم تامام ايسلانيب. ايچري گيرديکده، ائله گيره‌جکده اوست پالتاريمي سويونورام. عايله‌م بيرليکده ائوده‌ديرلر. من ايچري گيرر _گيرمز، اوغلوم قاچير قاباغا:– سالام آتا، آخشام سؤز وئرميسن بو گون منله توپ اويناياسان.

بولگه لر سرويسي:گونون اورتا چاغيدير. ياز ياغيشي شيديريغي ياغير.
تله‌سرک ائوه گليرم. اوست-باشيم تامام ايسلانيب. ايچري گيرديکده، ائله گيره‌جکده اوست پالتاريمي سويونورام. عايله‌م بيرليکده ائوده‌ديرلر. من ايچري گيرر _گيرمز، اوغلوم قاچير قاباغا:– سالام آتا، آخشام سؤز وئرميسن بو گون منله توپ اويناياسان.
من ده جاواب وئريرم:-اوغلوم باييردا ياغيش ياغير ، ايندي اولماز. نئينک، ياغيش کسسين گئديب حيه‌تده سنيله توپ اوينارام.زامان اؤتور و ياغيش کسير. اوغلوم دا مندن ال چکمير. نهايت بير يئرده حيه‌ته چيخيريق. هاوا چوخ اوره‌يه ياتيملي‌دير. ياز ياغيشيندان سونرا هر نه تميز و گؤيچک گؤرونور. اورکلره سئوينج پايلانير. کوچه‌دن اوشاقلارين و يئنييئتمه‌لرين هاي–کويو گلير. اونلاردا يازين ايليق هاواسيندان ذوق آليرلار. ائله بو آن اوغلوم هيجانلا، بارماغيلا گؤي عالمين منه گؤستره‌رک سئوينجله قيشقيرير:
– آتا، آتا . باخ »رنگين کمانا« باخ! نئجه‌ده گؤزلدير؛من ده گوي قورشاغينا باخديقدا، اوز توتدوب اوغلوما دئييرم:– هه چوخ قشنگدير، آما او »رنگين کمان« دئييل. او »گؤي قورشاغي«دير.اوغلومون چؤهره‌سينده اولان تعجبلي حيسي دويورام. او زامان اوغلوم سؤزه گلير:آتا. او »رنگين کمان«دير. ائله آنام دا، کوچه‌ده‌کي اوشاقلار دا و حتا باخچاميزداکي معليمه ده اونا»رنگين کمان« دئيير. سن منه يالان دئمزدين، بو دؤنه مني نييه آلداديرسان؟مني فيکير گؤتورور. بو صؤحبتلر مني بير آز سارسيديردا. اوغلوم دا بو حيسي دوياراق منه دئيير:– آتا نه اولدو . نييه کئفسيز اولدون؟بو دؤنه من اوغلوما يالان دانيشيرام:– اوغلوم بير آز باشيم آغريير. سن بو دفه گئت کوچه ده ياشيدلارينلا اوينا. سؤز وئريرم، بير آزدان گليب من ده سنلن اوينارام.اوغلوم کؤنولسوز مندن آيريليب، کوچه‌يه گئدير. من ده حيه‌تين پيلله‌سينده اوتوروب خيالا داليرام. ائله او زاماني دوشونورم کي اوغلوم ياشيندا اولارديم. گونلرين بير گونو آنام حيه‌تده دولاشير و سيل-سوپورله مشغول ايدي. من ده اؤز- اؤزومه نسه حيه‌تده آختاريرديم. بيردن گؤزوم گؤيده‌کي گؤزل بير منظره‌يه دوشدو. سئوينرک آنامدان سوروشدوم:
– آنا. او نه دير؟ گؤر نه قده‌ر گؤزل‌دير .آنام گولومسه‌يرک دئدي:– هه اوغلوم ،او فاطما خالانين حاناسي‌دير.نئچه گون اوستوندن کئچدي. بير گون آخشام اوستو آناملا قونشو حيه‌تينه گئتديک. ائله آستانادان ايچري گيرديکده حيه‌تده بير منظره گؤردوم. من گؤيده اولان فاطما خالانين حاناسيني، يئرده گؤروردوم. ائله بو آن سئوينرک هيجانلا قيشقيرديم:– آنا _آنا ،باخ. فاطما خالانين حاناسي. نه قدرده قشنگدير.ائله بو آن حانانين ياخينليغينا چاتميشديم . اليمي حانايا سورترک گؤزوم حانانين ايلک و آخريندا اولان يئره باسديريلميش آغاجلارا دوشدو. منجه حاناني آغاجلارا باغلاميشديلار. يئنه آناما دئديم :
– آنا باخ . آغاجلارا باغلاييبلار کي گؤيه اوچماسين. هه؟ائله بو آن قونشو قاديني ائودن حيه‌ته چيخيب و آناملا ساغولاشاندان سونرا من يئنه آنامدان سوروشدوم:آنا فاطما خالا بودور؟ نه ياخشي. ائله بيزيلن قونشويمش کي.آنام اوجادان گولرک دئدي:– يوخ اوغلوم بو اسمر خالادير. بو حانا دا گؤيه اوچماز. اسمر خالا اونو آغاجا باغلاييب کي اوزه‌رينده گويچک ناخيشلار سالا بيلسين. او کي قالدي گؤيده‌کينه، او دا گؤي قورشاغي‌دير. ائله بئله جاماعات آراسيندا اونا فاطما خالانين حاناسي دا دئيلير.
من داها دينمه‌ديم. اسمر خالا گلدي اوتوردو و ايشله‌مه‌يه باشلادي. من اونون بارماقلاري و اللرينين حرکتيني ايزله‌ييرديم. او هر حرکتده بير بويا ناخيشا آرتيريردي. گؤز اوخشايان ناخيشلار هر آن اؤتدوکجه ،بير رنگه دوشور و گؤزللشيردي. اسمر خالا ايشله‌يه–ايشله‌يه حزين ماهنيلار زومزومه ائديردي. اونون ماهنيلاري ندنسه منده بير نيسگيل و يا حسرت اوياديردي. ائله ناخيشلاردا اولان اينجه‌ليک و ماهنينين ملاحتليليي منه سئوينج دولو – کدرده باغيشلاييردي.ايندي يئنه‌ده او ماهنيلار و ناخيشلار گؤزوم اونونده جانلانير و قولاغيمدا عکس – صدا يارادير. ومن دوشونورم کي:– گؤره سن اوغلومون اوشاغي »گؤي قورشاغين« اوندان سوروشاندا هانسي ديلده آدلانديراجاق؟.

منبع :