نئچه گئجه گوندوز ايدي کي چال چاغير ايدي. مرادين قاپيسيندان او شنليک اولان قاپييا، باغلارين آراسيندان چکيلن يول، قارانليق ايدي. آزجا مراد ايوانين ايشيغي، هردن ده اسداله کيشي‌نين ايوانين چيراغان ائدن ايشيقلاردان، جانسيز شعالار، اودا يئل آغاجلاري ترپه‌دنده شاخلارين آراسيندان، بيرآنليق يولا ايشيق ساليردي. اوزو اوسته قارانليقدا سورونن قوجا قادين ايکي قيز اوشاغي‌نين ياخينلاشماسين هئچ بيلمه‌دي. قفيلدن بؤيورتکن کولونون آرخاسيندان چخيب اونلا قارشيلاشديلار. چتينليک‌له دوروب اوتوردو. ائله گؤستردي کي بير شئي آختارير: نه ايتيرميسن آخي ننه؟ کمک ائدک تاپيلسين.

کتده‌هامي‌اونو آخي يا آخي ننه سسلرديلر. جوانلار، نوه نتيجه‌لر آخي ننه، باشقالار ايسه آخي دئيرديلر. آدي آغا خانم زماني ايدي. جوان قيز چاغي، زماني طايفاسيندان آقايي طايفاسينا گلين گلميشدي. ايکي کؤکلو طايفانين نماينده‌سي کيمي‌حرمتي وار ايدي. منجه آدينا لايق بير انسان ايدي. هم آغا هم ده خانيم ايدي. کيشي صفت، محکم، عين حالدا لايق آغ بيرچک بير قادين. او اؤزو‌هامي‌ني کيچيک آدي ايله چاغيراردي. هئچ کسين آدينا آغا يا خانيم علاوه ائتمزدي. کيمسه ده اوندان اينجيمزدي. او صميمي‌ليک کي آخي ننه‌نين سسينده وار ايدي آغا يا خانيم سؤزونون ساختا خؤرمتيندن اوستون ايدي.– تاپارام بالا سيز يولوزدان قالمايين.. تاپارام.قيزلار بير آز تعجوب‌له آرالانديلار. او سورونه- سورونه اؤز اؤزنه دئدي: تاپارام… تاپارام… تاپميشام.!او تاپميشدي. دوز دئييردي. ديرسه‌يي‌نين يئره سورتولوب قاناماسي هئچ وئجينه ده دگيلدي. اسداله‌نين قاپيسيندا، يول آيريجيندا بيتن قوجا توت آغاجي‌نين ديبينده آياغا قالخدي. سس‌سيز اوست باشي‌نين توز تورپاغين سيلکه‌له‌دي. چاليب اوينايان جوانلارا نئچه دقيقه دالدادان باخدي. سس کويون ايچينده قوناق اوتاغيندان گلن اوغلو مرادين سازي‌نين سسين ده تانيدي. مراد قاراچي‌هاواسي چاليردي. سئوينجدن آخان گؤز ياشين سيلدي، اؤز ائوينه قاييتدي. قولونون سييريلميش يئرين ايستي سو ايله تميزله‌دي. قيرميزي داوا ايله درمانلادي، او آنلار خيالي نئچه ايل اوّله قاييتدي. او قارا گونلره، قارا خبر ياييلان گونلره. قيز نوه‌سي اردشير، ايران عراق محاربه‌سينده ايتگين دوشن گونلره.اسداله کيشي رحمتليک عزت خدادادي ايله کرمانشاها، اوردان لاپ جبهه خطينه قدر گئديب عقلي چاتان يئرلري امکان اولان قدر، اوغلون آختارميشدي. هر کيمدن کي بير نشان بير علامت، حتي اولسون اويدورما بير خبر ائشيديردي، يوللانيردي. سون وقتلر، يني بير خبر آردينجا گئدنده بئله دئميشدي: دوه‌سي ايتن بير نفر هر يئري آختاريب الي بوش مأيوس قاييدير. يالنيز گوماني گلن بيرجه دره قاليرميش کي اوخويا-اوخويا اورا اوز توتور. باشقا بيريسي اونو عارسيز سانيب دانلاماق قصدي ايله دئيير: کيشي! وار يوخون بير دوه‌دي کي ايتيرميسن. هله سؤيله‌ييرسن ده؟!!کيشي دئيير: بير دره‌يه گومانيم گلير. اوراني آختارماغا گئديرم. الي بوش قاييتسام هؤنکورتومو گؤره‌جک‌سن.!دوداقلاري‌نين تيتره‌مه‌سين گيزلديب تئز اوزون دؤندريب گئتميشدي اسداله کيشي.او ايتگيدن آغري اذيت چکمه‌ميش بير قوهوم اولاد يا حتي دوست تانيش قالمادي. من حيات يولداشيم ايله قيشين قارلي شاختالي گونلري کيچيک اوشاغيميزي ائوده قويوب زندانلاري، خسته خانالاري، انقلاب دادگاهلارين، پادگانلاري آختاريرديق. قاينيم اردشير کؤنوللو سرباز گئتميشدي. او بؤيوک بير عملياتدا ايتميشدي. او گونلر چوخ چتين گونلر اولدو هر قوهوم قونشو بير نذر ائله‌ميشدي. بالاجا اوشاقلاردا نذر ائله‌ميشديلر، حتي مکتوبدا يازميشديلار تانري يا، آقا امام زمانا (عج)..آخي ننه ده نذر ائله‌ميشدي کي نوه‌سي سلامت قاييتسا اؤز ائويندن قيزي‌نين قاپيسينا قدر سورونه-سورونه گئديب تانريا تشکّرونو بيلديرسين.پالتاريني دَييشيب قيزي محترم‌ين ائوينه قاييتدي. شنليگه قوشولدو. قادينلارين شام بيشيرمه‌سينه نظارت ائله‌دي. جوانلاشميشدي آخي ننه. هم ايتن نوه‌سي تاپيلميشدي هم ده سس‌سيزجه نذرين اؤده‌ميشدي.آخي ننه‌نين سونو يامان آغير گلدي. اونوتقانليق خسته‌ليگينه دچار اولدو. ناخوش اولاندان بير مدّت سورا تبريزده وفات ائله‌دي. اونون آلزايمر خسته‌ليگي تزه بللي اولان زمان اوشاقلارا هله بيلينديرمه‌ميشديلر. آنجاق طايفانين بؤيوکلري بيليردي. عوام ساياغي يامان دا اوتانيرديلار. آخي خسته‌ليگين نه اوتانماسي؟ تأسفلر کي آخي ننه دُنياسين دَييشن آنلار بير عُمرون آجيلي شيرينلي آلوان خاطره‌سيندن بير اپيزود دا خاطيرلايانمادي.تزه ناخوش اولدوغو گونلرين بيرينده آخي ننه ايله ايکيميز، قيزي ائوينده ائيواندا اوتوروب چاي ايچيرديک. عادي صحبت ائله‌ييردي. جوان چاغلاري ائولرينده کچن آغير قوناقليقلاردان، آدلي سانلي خان خاواني‌لاردان، اوغلو مرادين شانلي کئچميشيندن، معلم اولدغو ايللردن، ساز مجلسلريندن، يادينا دوشن بوتون شيرين خاطره‌لردن دانيشيردي. هئچ من‌له او ساياق دانيشماميشدي. بيردن سوسدو. درين فيکره گئتدي. باغچاداکي گؤيرچين قوشلارينا گؤزون تيکيب حسرت‌له دئدي: داي من ده بئله اولدوم، علي!!گيزلين بير سرّي اجازه‌سيز آچان اوشاق کيمي‌اوتانديقدان رنگي دَييشدي. الينده کي چاي استکانين ياريمچيق يئره قويدو، ديک آياغا قالخيب يئيين گئتدي.عؤمرومده‌ او جور عاجز قالماميشيدم من. ديليم توتمادي کي بير سؤز دئييم. نه ياخشي کي توتمادي دا!. آخي نه دئيه بيلرديم؟!! منجه اونون حاللي حوصله‌لي چاغلاري کئچميش خاطره‌لرين اؤز ديليندن ائشيديب يازان اولسايدي شيرين بير رومان چيخاردي کي ارسبارين معاصر تاريخي‌نين بير پارچاسيندا اوندا گؤرمک اولاردي.اردشير بهروزي سونرالار راديولوژي اوخودو. ايندي ده تبريز خسته‌خانالاريندا ايشله‌يير. اونا مراجعت ائدن تانيش يا غريبه خسته‌لره اليندن گلن کمگي هئچ زمان اسيرگه‌مه‌ييب.‌هامي‌نين صميمي‌خؤرمتين قازانيب. خصوصي‌يله قاراداغلي‌لار هميشه اونا دوعا ائدرلر. سؤز وئريب کي جبهه خاطره‌سين، نئجه يارالانيب اسير دوشمه‌سين، اسارتده کي ايشکنجه‌لرين، بير گون يازيب يايسين.‌هاما گؤزوم سو ايچمير. او چوخ تواضع‌کار انسان‌دي. هر زمان اسارتيندن سوروشساق جوابدان چکينر. دئيَر: کئچدي گئتدي او ايللر. بعضيلر کيمي‌او کئچميشه فخر ائديب باشينا گلنلري شيشيرديب افسانه‌وي ناغيل ائتمز. بير ده قاييتماسين او آجي ايللر.!!