قاش قارالان چاغي
1398/07/01
بولگه لر سرويسي: هردن قاش قارالان چاغي، ايشدن قاييداندا تويوق قيچي آليب آپاراردي ائوده سوپ پيشيرردي، يا دا بير پونزا بويون- قاناد آليب پيشيريب ايکي يئرآلما، بير چيمديک دوز، بير قاشيق دا –اولسايدي- روب آتاردي ايچينه، هم تيلته‌سيني يئيه‌رديلر هم ده ات- دريسيني سوموکدن آييريب، ات‌دؤين‌له ازيب هره‌سي بير ايکي- تيکه بورمالاييب قوهوم- قونشو سوروشاندا، آبگوشت يئميشيک دئيرديلر.
آما آيدان– آيا دئييل، گوندن- گونه دئييل، ساعاتدان- ساعاتا قات- قات آرتان باهاليق دوشندن بري، اوچ- دؤرد آي اولاردي ائولريندن سووزو ايله يئرآلمادان سئواي باشقا پيشميش اييسي چيخميردي. هله اونو دا دويون- قارين دئييل، اؤلمه- ديريل، قارين‌لاريني آز-ماز باسديراجاق قدر يئييه بيليرديلر آنجاق.
بالاجا قيزي ساپ ساري سارالميشدي. اوغلو ايسه، ياشي‌نين لاپ يئييمجيل چاغيندايدي. گونو گوندن اري‌ييب سولوردو بالالاري گوزونون قاباغيندا. اري ده بير بوجاقدا ميسيب، سيغاري سيغار اوسته قويوب، بونون جاني‌نين ماياسيني، آلين تري ايله، مين بير ميننته قاتلاناراق گوج بيللاهنان قازانديغيني‌هاوايا پوفله‌ييردي کي، مثلن غصه‌لي‌يم، چاره‌سيزم، زمانه بدبختي‌يم… ايل‌لر اؤنجه ساغ الي‌نين بارماقلاري ايشده اره‌يه گئتميشدي.
ساغ اولسايديم ائله ائلرديم، بئله ائلرديم دئيه، گؤتوبوشلوغونو اؤرتباس ائله‌ييب، تنبل‌لييني ياسالاياردي. حالبوکي، غيرتي اولان آدام، بارماقلاري سهل‌دير، ال‌لري ده، قول‌لاري دا گئتسه، بير تيکه چؤره‌ک اوچون بوينونو چيينيه قويوب باشقالاري‌نين امه‌يينه گوز تيکيب تاماح ساللاماز.
نه ايسه، او گون ده سحري تئزدن دورورب ائوي- ائشيگي ييغيشديريب، ائو اهلي‌نين چاي- چؤره‌گيني حاضيرلاييب، يولا دوشمک ايستيردي کي، اوغلو سسلندي: گئديرسن آنا؟ ناهارا نه قويدون؟
ناهار؟… ناهار؟… نه دئسين، نه جواب وئرسين… نه‌ييميز وار کي نه قويام آي بالا، دئمک ايسته‌دي اما اوره‌گيندن گلمه‌دي. آخي اومودسوزلوق آجليغين آجيسيني داها دا دؤزولمز ائده‌ر. او بونو ياخشي بيليردي.
“بير تهر گئچينين،گله‌جم سوپ قويام شاما” دئدي، چاديراسيني باشينا آتيب غم‌لره بوغولان اوره‌يينه داش باسيب ائودن چيخدي…
زنگي ووردو، خانم قاپيني آچدي، ايچري گيردي. “خانم، آغا گئديب يا ائوده‌دير؟”- دئيه سوروشدو. “راحات اول، هئچ‌کيم يوخدو، اؤزومم فقط”- دئدي خانم.
چاديراسيني آچيب قول‌لاريني چيرمالاييب ايشه باشلادي. خانيمين آخشام يئمه‌يينه قوناغي واريدي. ? دانا ايري تويوغو قويموشدو ات تخته‌سي اوستونده تميزله‌ييردي. جام‌لاري سيله- سيله تويوق‌لارا باخيب درين آه چکدي. اوغلونا “سوپ پيشيره‌جم” دئميشدي. خانيم تويوق‌لارين دريسيني چيخارديب، سومويونو آييريب، يان يؤؤره‌سيني قوپارديب سالدي بير نايلونا، اونو دا آتدي زيبيل قابينا… آخ! بو زيبيل ايله او بئش- آلتي اؤونه سوپ پيشيره بيلردي. نئچه دؤنه آغزيني دولدوردو خانيمدان اجازه آليب او نايلونو زيبيل قابيندان چيخارتسين، آما اوزو کسمه‌دي. کوره‌يي تير چکدي.
خانيم سئوينجک اونا دئدي: ” هله، موشتولوغومو وئر، مکّه‌يه آديميز چيخيب، گلن آي گئديريک!”، “موبارکدي، ساغليغينان ايشاللاه!” دئيه جواب وئردي و اؤز- اؤزونه فيکيرلشدي کي، دؤرد ايلده بو اوچونجو مکّه‌سي دير خانيمين…گئنه کوره‌يينده ايلديرم شاخان کيمي‌اولدو. زيل سسي ايله “آاااخ….” دئدي. “نولدي سنه؟ حالين ياخشيدي؟” دئيه سوروشدو خانم. ” هن، ياخشي‌يام خانم، هر شئي يولوندادير، بيز‌هامي‌ميز ياخشي‌ييق” دئدي…
قاش قارالماقدايدي. يورغون- آرغين، ازيک- يئنجيک ائوه دؤنوردو. بير تويوقچونون قاباغيندا دوروب بير آز وار- گل ائله‌ديکدن سونرا باخدي توکاندا هئچ‌کيم يوخيدي. گيريب اوزونه اوز باغلاييب دئدي: “تميزله‌ديييز تويوق‌لارين سوموک- دري‌لريندن ايستيرديم ياريم کيلو.”
” ائي داااد! اون ديقه قاباق گلسه‌يدين آتماميشديم ائشييه.” دئدي تويوقچو. “نئيله‌يک، جانين ساغ اولسون” دئدي و چيخدي. تله‌سيردي.
يوباناندا اري دئيينيب ساواشيردي. يئتيشمک همن چادرا چارقاتيني گول‌ميخا آسدي، دينجيني آلمادان باشلادي اؤز ائوي‌نين ايشلرينه. اوشاق‌لار آنالاري‌نين الينه باخيرديلار. خانم گيلده يئمه‌ديگي خؤرک و ميوه‌ني اونلارا گتيرردي هميشه. کيشي بير قورو يورولما بيله دئمه‌دن باغيردي: “منه سيغار آلدين؟”
اونا قئيقاجي باخماغا دا اينجاري قالماميشدي. کؤره‌يي تير چکيردي… قيزينا دئدي: “مداد- کاغاذ گتير آللاها بير مکتوب يازاق، خانم آپارسين مکه‌يه، آلله گينه ايسته‌ميش اونلاري”
»سلام آللاه. بيز‌هامي‌ميز ياخشي‌ييق!…«
منبع :