هارا گئتديگينه دايير هئچ بير دوشونجه‌سي يوخودو و قورخو ايچره آخساياراق يئريمه‌يه داوام ائتمکدئيدي. بيردن اوزاقدان گلن اولاما سسي، ووجودونا سويوق بير تر باسديردي. تيترمه ايچينده دوشوندو: ” گؤره‌سن قورد سسي‌مي‌دي، يوخسا قاچماسيندان خبردار اولوب، پئشيندن دوشن ايتلرين سسي‌مي؟ ” هر ايکيسي ده اونون اوچون ياخشي بير ايشاره دئييلدي. بونا گؤره ده، سينان باجاغينين آغريسيني هئچ اؤنمسه‌مه‌دن سورعتيني آرتيردي. تپه‌نين اوستونه دوغرو چيخارکن، آياقلارينين آلتينداکي ازيلن اوتلارين خيشيلتي سسيني ائشيده بيليردي. چه‌ييرتکه‌لرين سسي، اوتلارين خيشيلتيسي و ياواش ياواش ياخينلاشان اولاما سسلري. باشي گيجلمه‌يه باشلادي. يورقونلوقدان و سينان باجاغينين زونقولتوسوندان داها اؤزونو ساخلايا بيلمه‌دي. قوروموش بير قويون قيغي کيمي، تپه دن آشاغي دوغرو ديبيرلاندي. هر  دؤنوشده باجاق آغريسينا باخماياراق، يوموشاق اوتلارين اوستونده فيرلانيب دؤنمک، ايچينده گؤزل دويغولار ياراديردي. سانکي بير کپنک کيمي‌گؤي اوزونده اوچوردو. اوشاقليق گونلريني خاطيرلادي. آناسي، باجي قارداشلاري‌هاميسي بيرليکده، چؤلده گزن او شاد گونلريني يادا سالدي. يونجالارين و گول چيچکلرين آراسيندا يولداشلاري ايله، قووالا قاشدي اويناردي. گيزليجه گوللرين اوستونه قونان کپنکلرين اوستلرينه هوبلاييب، اونلاري ديکسينديرردي و بو ايشدن او قدر گولردي کي اؤزونو آياقدا ساخلايا بيلمزدي. سونرا او بيري يولداشلاريني قووالاييب تپه دن آشاغي دوغرو قاچاردي. باشينين بير داشا چارپيلماسي اؤنجه اونو اويانديردي و سونرا درين بير راحاتليغا دالديردي. آرتيق هئچ بير شئي حيس ائتميردي، نه باش گيجلمه‌سي، نه باجاغينين آغريسي و نه ده اولاما سسلريني ائشيديردي. کنده دؤنموشدو. يولداشلارينين يانيندايدي. چوخلاري حوزون حوزون آغلاشيردي. قهوه‌اي‌لردن بيري، اتلي جانلي و شيشمان اولان دوداقلارينين آراسيندا دوعالار ميريلدانيردي و اوبيري قهوه‌اي‌لر و آغلارلا، قارالارين بعضيلري اوندان سونرا اونون اوخودوغو دوعالاري تئکرارلاييرديلار. بير نئچه‌سي بوجاقدا سسسيز اوتورموشدولار. سانکي اؤلوم طالعلريني قبوللانميش، صاباحي و هر شئيين بيتمه‌سيني گؤزله‌ييرديلر. بعضيلري عصبلي شکيلده اويانا بويانا گئديرديلر. – بسدير بو قدر قويون کيمي‌ياشاماق. بسدير بو قدر مال حئيوان کيمي‌دوشونمک آمما اونون باغير چاغيرينا کيمسه قولاق وئرميردي. هرکس اؤز کدرلي حالينا قاپانميشدي

گئنه اوجا سسله بير داها قيشقيردي: – آي جاماعات! اويانين آرتيق. صاباح بوردا بير قتل عام اوز وئره‌جک. نئيه باشا دوشمورسوز. صاباح‌هاميميزي اؤلدوره‌جکلر. آغلاييب، دوعا اوخوماقلا بيزيم طالعيميز دئييشيلمه‌يه‌جک. آي ميللت! ال چکين بو ايشلردن. گلين دوشونک، چارا يولونو تاپاق. آمما کيمسه اونون‌هايينا جاواب وئرمه‌دي. سون دفعه گوجونو توپارلادي و نفسيني جيگرلرينه دولدوروب، بوغازينين ان درين يئريندن باغيردي: – سوسوووووووووون……………..

بيرآن‌هامي‌سوسدو، هرکس اونا دوغرو دؤندو

– منيم قارداشلاريم باجيلاريم! قهوه‌اي‌لر، آغلار، قارالار! دينله‌يين مني. يولداشلاريم بئله اولماز. دوروموموز چوخ پيسدي. سيزي آند وئريرم سئوديکلريزه، هئچ اولماسا بير دقيقه منه قولاق آسين. هامي‌قولاقلاريني شوشله‌ديلر. اونون اطرافينا ييغيشيب، بير دايره اولوشدوردولار. – سئوگيلي قارداشلاريم! آغلار، قارالار و قهوه‌اي‌لر! من،‌هاميني بيرليگه و ال اله وئرمه‌گه چاغيريرام. گلين قول قولا وئره‌ک و صاباح بو قاپيدان ايچري گيرن هرکسين اوستونه يوگوروب دارماداغين ائدک. اينانين بيرلشسک، کيمسه بيزيم قارشيميزدا دايانا بيلمز. هامينين ايچينده پيچيلتي سسلري ياييلماغا باشلادي. اينقيلاب، عوصيان، قييام سؤزجوکلري پيچيلتي سسلرينين ايچيندن سئچيله بيليردي. دوعا اوخويان شيشمان قهوه‌اي سسه گلدي: – اينقيلابا گرک يوخدو. صاباحداکي اؤلنلر، شهيد اولاجاقلار. صاباح‌هاميميزين يئري جننتدي. گئنه ده من اينقيلابا راضييام، چونکي اينقيلابدا دا اؤلنلرين يئري جننتدي، آمما بير شرطيم وار. اينقيلابين رهبري قهوه‌اي‌لردن اولماليدي. من بير قهوه‌اي اولاراق بو اينقيلابين رهبري اولمالييام. قهوه‌اي‌لر سسلريني باشلارينا آتديلار ” قهوه‌اي‌لر اوياخدي… رهبرينه داياقدي ” هر طرفدن قريب قريب سسلر ائشيديلردي. ” گلين دؤولت قوراق ” ” باش باخانيميزي اينديدن بللي ائتمه‌ليييک ” ” گله جک ميللي مجليسيميزين وکيللريني سئچمه‌ليييک ” عوصيان سؤزونو اورتايا آتماقدان پئشمان اولموشدو. اوره‌گي بتردن سيخيليردي، آز قالسين سيخيلماقدان پاتلاياجاقدي. ايچينده کي آشيب داشان کدر او قدر چوخودو کي،  هئچ آغلايا دا بيلميردي. بلکي آغلايا بيلسئيدي، بير آز دا اولسا اوره گي آچيلاردي. بير آن او دورومدان قورتولماق ايستيردي. صاباحين اؤلوموندن چوخ، يولداشلارينين آخماقليغيندان قاچماق ايستيردي. ” قاچماق، قاچماق، هه تکجه چارام قاچماقدي” گؤزو بيردن دووارداکي، داما ياخين پنجره‌يه ساتاشدي. پنجره‌نين چوخ يوکسکده اولدوغونو و اونا نئجه چاتماغيني ساليب چيخدي. ” تايلار، دوغردور تايلارين اوستونه چيخيب پنجره‌يه چاتا بيله‌رم” دئيه دوشوندو هامي‌اينقيلابا رهبر سئچمک، گله‌جک دؤولت و ميللي مجليسينين وکيللري اوزه‌ره، دارتيشماقدايدي. بعضيلري هله ده بوجاقدا سسسيزجه اوتوروب، اؤز اؤلوم طالعلريني گؤزله‌ييرديلر. آمما او اؤز قراريني وئرميشدي. تايلارين اوستونه چيخدي و هوبلاياراق يوکسلمه‌يه باشلادي. سونوندا باجاردي. پنجره‌يه يئتيشدي. پنجره‌دن ائشيگه بويلانيب باخدي.‌هاوا قارانليقدي. هئچ بير شئي گؤرنموردو. سون دفعه دؤندو و پنجره‌دن ايچه‌ري باخدي. الوئداع دئييب، اؤزونو ائشيگه آتدي. يئره دوشدوغوندا داغ کيمي‌آغير بير سانجي بوتون ووجودونو بورودو. باجاغي سينميشدي. گؤزلريني آچدي. هر شئي يادينا دوشدو. تپه‌دن آشاغي ديبيرلانميشدي. باجاغينين آغريسي اؤلدوروردو. اطرافينداکي خورولتو سسلريني ائشيديردي. چئوره‌سينده دولاشان قوردلاري گؤرونجه باجاغينين آغريسني اونوتدو. قارنينا، بئلينه و باجاقلارينا باتان ايتي ديشلري حيسس ائده بيليردي. آرتيق هر شئي بيتميشدي. سحر چاغي تپه‌نين آلتينداکي قاچقين قويوندان، يالنيز آل قانينا بويانميش بير دريسي قالميشدي، بيرده آچيق گؤزلري ايله، قوربان بايراميندا تپه‌نين آرخاسيندان دوغان گونشه باخان قافاسي…