آنامين گوزلري

بولگه لر سرويسي: بوجلسه‌نين موضوعسو گوزدو ائشيتديغيمدا بير ذرّه ده ايچيم اوشومه‌دي. »دا من گوزه گوره ده يازا بيلميه‌جاغام باشيمي‌قويوم اولوم دااا« دئديم اوزومه. »گوزه گوره يازماغا نه وار، چتيني کامپيوتري آچانا کيميدي، سو کيمي‌آخيب گئدجک« دئييب حئکايه فولدريني آچيب شوماره ووردوم.

سودابه تقي‌زاده زنوز

بولگه لر سرويسي: بوجلسه‌نين موضوعسو گوزدو ائشيتديغيمدا بير ذرّه ده ايچيم اوشومه‌دي. »دا من گوزه گوره ده يازا بيلميه‌جاغام باشيمي‌قويوم اولوم دااا« دئديم اوزومه. »گوزه گوره يازماغا نه وار، چتيني کامپيوتري آچانا کيميدي، سو کيمي‌آخيب گئدجک« دئييب حئکايه فولدريني آچيب شوماره ووردوم.
»18-جي حئکايه   گوز…«
بسم الله رحمن الرحيم دئمه‌ميش چيرمه‌لنديم کي يازماغا باشلييم. اوز يانيمدا دئديم »قوي بونو بير يازيم الدن چيخسين سونرا اوتوروم او بيري ايشلريمي‌گوروم«، باشدان سووما ادبياتيما گوره اوزومدن ده حئکايه‌دن ده، حئکايه جلسه‌سيندن ده، موضوعداندا اوتانديم. »جاماعات بئکار دئييل سنين باشدان سووما يازيلاريني اوخوسون  اوتان« دئديم اوزومه. اوتانديغيمدان آرتيق گوزون گوزلرينه بيله باخا بيلمه‌ديم. باشيمي‌آشاغي سالديم. »دوزدو گوزه گوره يازماق سو ايچيم کيميدي سنه، اما بوجور حاقسيزليق ائتمک ده دوز ايش دئييل. سنه باخما قلمين گوجلودو، هله هله سنين کيمي‌يازار تاپيلماز، اما آدام گره بيرآز تواضع‌کار اولا، ائله اولمايا کي دووشان ايله توسباغا ماجراسي کيمي‌بيردن گوزون آچاسان گوره‌سن توسباغادان دا اودوزوبسان! ايندي کي گوزه گوره يازيرسان پس سن ده گوزلريني قشه آچ ديقتله يازماغا باشلا» دئديم.
ائله اوجور ياتديق يئرده اييليب يانيمداکي ليواني گوتوروب دونن گئجه‌دن ايچينده قالميش سويوق چايدان بير قورت ايچيب، دريندن بير نفس آليب »هه، ايندي اولدو بااا، ايندي يازارام داي« دئييب، صحيفه‌نين باشينا گئتديم. صحيفه‌نين باشيندا يازديغيم »گوز« کلمه‌سيني بولد ائلييب آشاغي سطيره گلديم.
قالديم بوش صحيفه‌يه باخا باخا، اللريم کيبورد اوسته قيفيللاندي. نه قدر چاليشديم عاغيلما بير زاد گلمه‌دي. گوزلريم قارالدي. اتاق ائله بيل باشيما دولاندي. »اَه، يئنه فيشاريم دوشدو، آخي بير يوخودان دور، بير گوزون آچ، بير دور اَل-آياغين يو، باش-گوزن بير سرين سو ديسين سونرا گل اوتور نه ائليرسن ائله دااا« دئديم. يازماقدان قاچماق اوچون ياخشي بير باهانا تاپميشام کيمي، کامپيوتري تز يانيمداکي صندلين اوستونه بوراخيب آياغا دوردوم. چايدانين آلتين يانديريب توالته گئتديم. اَل-اوزومو يويا يويا دئديم »دوزدو دوهدور دئييب سينوزيتيمه گوره سرين سو ايله اَل-اوزومو يومويوم، اما سويو لاب دا بئله سرين ائلييجاغام بلکه بئينيمين گوزو آچيلسين«. اليمي‌نئچه دفعه سرين سو ايله دولدوروب اوزومه چيرپديم. ياش اللريمي‌ساچلاريما چکيب اوزومه توکولن توکلري داليا وئرديم. سونرا گليب کابينتدن بير کيسه‌اي چاي گوتوروب ليوانين ايچينه آتديم »بونو ايچسم، جانيم قيزيشسا، داي يازارام بااا« دئديم. قيزيشما سوزونو ديليمه گتيرديکده بيردن ائله بير قيزيشما جانيمي‌آلدي کي دئديم ائله ايندي دي کي حالدان گئديم. تز اوزومو پنجره‌يه چاتديرديم. پنجره‌ني آچينجا سرين‌هاوا اوزومه ياش ساچلاريما ديدي. خوش بير حس ال وئردي. »بئله‌هااا دئديم، ايندي بيليرم نييه يازماغيم گلميردي، آدام گره اول نقشينين حيسسينه گئده با، گوزلرين آچيب-آچماز دا حئکايه يازماق اولار آخي؟!« ‌پازلين ايتگين تيکه‌سين تاپميش کيمي‌سرخوش-سرخوش باشيمي‌پنجره‌دن ائشيه چيخارديب دريندن بير نفس آلديم. اکسيژن يئرينه دي اکسيد کربن بوغازيمي‌يارا يارا آشاغي گئتدي. رمانتيک حاليم درحال پوزولدو. »من ائله اَره گئتماغيمينان، هم رمانتيزمين هم ده بازارين عيني زاماندا گوزونو چيخارتميشام دااا، هله اوتانميرام حييسه‌ده گئديرم« دئديم اوزومه.
هرچند فمينيستلر بو ائوليليگه »آغ ائوليليک« يا »ازدواج سفيد« دئييرلر، اما هر دفعه صحبتي اولاندا آنام شيناسنامه‌مين ايکينجي صفحه‌سين آز قالا گوزومه سوخوب ديير »هاني با؟‌هاردا يازيب؟!« اوزونه جيددي باخيب دئييرم: »دئييرسن بس نييه آغ ائوليليک دئييرلر؟! چونکي آغ خودکارينان يازارلار اوخونماز، ‌اونا گوره! اونو اوخوماق اوچون اينسانين گوزونده مخصوص اشعه‌لر اولماليدير« اوّل اينانسادا سونرا منيم شوخلوق ائله‌دييمي‌گوروب داها دا عصبيلشر.
 »يوخ منيم مخصوص اشعه‌م يوخدو، سن آپار دئ ننم کوردو، قارا خودکارينان دئ يازسينلار ائله« دئيير. الينده اولسا منيم ده فمينيستلرين ده گوزونو چيخاردار. يولداشيمين و آغ ائوليليگين مزيتلريندن نه قدر تعريفلسم ده، نه مني نه ده يولداشيمي‌گورجک گوزو اولماز.
پنجره‌ني باغلييب، اتاغا گئديرم. صحيفه‌ني آچيرام،»18-جي حئکايه، گوز…«گوز دئيينجه، قئين آنامين دَلمه گوزلري ياديما دوشور. دئييرم الله ائلمه‌سين اوشاغيمين گوزلري اونا چکسين. آنامين گوزل رنگلي گوزلري ايله توتوشدورورام اونون گوزلريني. قديمدن دئييبلر قيزدا اوز، اوزده گوز. يوخ سن الله، قيزيم اونا چکمه‌سين. اونون قيزيم قيزيم دئماغينا دئييل کي اوزوم ائشيتميشديم تلفوندا يولداشيما دئييردي »اوزگه قيزينا خاطير بيزي آتميسان«. اونون بو سوزونو ائشيدينجه، کنديميزده کي دلي حسن ياديما دوشموشدو. حسني دلي اولدوغو اوچون آپاريب اوزاق بير کنددن ائولنديرميشديلر. خانيمينا دلي اولدوغونو دئمه‌ميشديلر. يازيق قيز گليب وضعيتي ائله گورونجه ايختياري اليندن چيخميشدي. آرتيق اَر اوشاق، عاييله‌ني بوراخميشدي.‌هانسي کيشي اوزونه گولسيدي گئجه‌ني اونلاردا کئچيردردي. آتام بير گون »حسن بس خانيمندان گوز اول جاماعات داليسيجا پيس سوزلر دئيير« دئميشدي. »آي حاجي، نه ائلياق آخي، ‌من اوزگه قيزينا خاطير اوزومو ناراحات ائليه بيلمه‌رم!« دئميشدي. آتام سويو سوزولموش ائوه دونموشدو. قئين آنام اوزگه قيزي دئيينجه حسن ياديما دوشموشدو. لاب زهلم گئتميشدي آرواددان. »ياخشي ائوليليگيميزي قارا خودکارينان يازديريب سنله گوز گوزه اولمورام« دئميشديم اوز يانيمدا.تلفونو گوتوروب يولداشيما يازيرام
»سلام، بو هفته گوزه گوره يازاجاييق نه يازيم؟!«»سئوگي حئکايه‌سي ياز، قارا گوزلره گوره ياز ياز: کارا کارا گوزلر اونا بونا باکيور، کيسکانيوروم…« آرديجا »اگر بيلدين بونو کيم اوخويوب؟!« يازميشدي.جواب وئرمه‌دن تلفونو قيراغا قويموشدوم، اوز اوره‌ييمده »سنين ننه‌ن اوخويوب« دئميشديم.
آرتيق عصبيلشمه‌يه باشليرام. بو قدر راحات سانديغيم بير موضوعنون قاباغيندا عاجيزلميشم.‌ سانکي سوز بولاغيمين گوزو توتولوب.
باغداکي سو بولاغينين گوزو توتولاندا بير آغاج گوتوروب، سو گلن يئري دئشرديک. قاباغينداکي چوپلري، اوتلاري قيراغا وئرديکده سو بيردن آخيب گلردي. کوزه‌نين باشيني بولاغين گوزونه داييب دولدورارديق. بلکه بو گون منه ده ائله بير چوپ لازيمدي،. دييسن بئينيمين گوزونو ده بولاغين گوزو کيمي‌زير زيبيل توتوب بو گون. اما هله کيم دئيير گوزون بولاغي بئييندي؟! ياني‌هامي‌بئيني ايله دونيايا باخير؟! هئچ اينانميرام.بير چوخ آداملار قارينلاري ايله دونيايا باخارلار. اونلارين يئکه قارينلاريندا ايکي گوز وار، هر زادي اونلار يئمک گوزونده گوررلر. داشدان يوموشاق نه اولسا ييرلر. دادين، مزه‌نين اونلارا هئچ فرقي يوخدو. چوخ آداملار دا وار گوزلرينين بولاغي آغيزلاريدي. ايرمي‌دورد ساعاتا گوزلري اينسانلارين گئيديکلرينده، يئديکلرينده، ائو ائشيکرينده دير. گوردوکلريني سوز ائلييب آخشام قونشولارا دييرلر. بعضيلرينين ده گوزلري اورکلرينه باغليدير. اونلار تز عاشيق اولارلار،‌هارا باخسالار اوردا عشقدن بير نيشانه گوررلر. بعضي اينسانلاردا وار دونيا وئجلرينه دئييل. دونيا داغيلسادا اونلار اوز ايشلرينده‌ديلر ايستر توي اولسون ايستر ياس، ايستر لاب بئله اوچونجو دونيا ساواشي اولسون، بونلارين حاليندا هئچ فرق ائتمز، اونلارين داي گوزلري‌هارا باغليديرکي بو قدر بِ خيالديلار، بيلميرم!ايندي منيم گوزلريم‌هانسي گوزلردندير؟! نه يئييمجيلم نه سوزباز، نه عاشيقم نه ده بِ خيال! اصلينده گوزلريم بدنيمين‌هاراسينا باغليدير هئچ ده اونملي دئييل، هر‌هانسي گوزونن يازيرام يازيم، آنجاق بو حئکايه‌ني يازيب قورتارماليام بو گون.
»18-جي حئکايه  گوز…«
ايشيغين يايديغي معلومات اساسيندا آرازآذربايجان راپورونا گوره ،تلفونوم زنگ چالير، آنامين گوزل گوزلري تلفونون صحيفه‌سينه دوشوب… کامپيوترين گالريسيني آچيرام. آنامين شکيليني ووردون بوش قالميش صحيفه‌سينه سانجاقلاييرام. بعضي زادلار يازماغينان اولماز اونلاري آنجاق گورمک لازيمدي!

منبع :