اطرافي غريبه موسيقي سسي بورودو
1398/04/23
بولگه لرسرويسي: قوجالار عصالارينا ديرسکله‌نيب، جاوانلار قوللاريني سينه‌سينده چارپازلاييب، اوشاقلارسا اللريني پاچالاريندا سيخيب گؤزله‌ييرديلر.هامي‌الي ايله “مانع اولما” ايشاره‌سي وئرير، مني سوسماغا سسله‌ييردي. کوره يينده مکتبلي چانتاسي، ماراقلا آتيليب دوشن بير اوشاغين يانيندا چؤمبلديم.
– قاقاش، نه‌يه باخيرسيز؟
– دئسم، مني قوجاغينا آلارسان؟
سونرا قوجاغيمدان ساغ قولاغيما “آذربايجانلي ايلا ائرمني داوا ائليه‌جک” دئيه پيچيلدادي. مئيدانا ييغيشانلارين ياريسي ائرمني، ياريسي آذربايجانلي ايدي. قارشي-قارشييا دوران بو صيفتلرين هر بيريندن عئيني تبسسوم بويلانيردي. اوزلرده‌کي نيفرت قوجالي- جاوانلي‌هاميني بير-بيرينه اوخشاتميشدي.
هامي‌اؤز تاييني ايهاملا تحقير ائديردي؛ آذربايجانلي قوجالار اللريني گؤيه آچيب قارشي طرفه بلا ديله‌يير، ائرمني هم ياشيدلاري‌هاوادا خزل کيمي‌يئلله‌ديکلري اللريله اونلارا “نه گونده‌سيز؟
” جاوابي وئريرلر، بيزيم گنج‌لر ديشلريني قيجييير، ائرمني قولو زورلولاري قانلي-قانلي فورصت گؤزله‌ييرديلر. ائرمني اوشاقلاري ديللريني چؤلده ساخلايير، باش بارماقلاريني بالاجا اوووجلاريندا دوزلديک‌لري “يووا”دان چيخاراق آذربايجانلي بالاجالاري تحقير ائديرديلر.
بيزيم کي‌لرسه، شالوارلاريني آشاغي ساليب زوغال بويدا دودوشلاريني ائرمني ياشيدلارينا تکليف ائديردي. کيمسه يئره توپورور، قارشيسينداکي بوغازيني چکيب اوندان دا بؤيوک توپورور، قادينلار اللريني جوتله‌ييب بير-بيرينه “کول باشينا” ائديرلر. مئيدان قيزيشيردي. ايللردير ييغيليب قالان حيرص، هيککه پارتلاماغا حاضير ايدي.
بو واخت تونل‌لرين آغزيندان آغ توستو چيخدي. هر ايکي تونل دن عيني بويدا، عيني ياشدا اوغلان گؤزه ده‌يدي ايين‌لرينده غريبه ناخيشلي ابالار… بوتا، اولدوز، اود، لچک ايشاره‌لريله بزه‌ديلميش پالتارلار بنزر ايدي. آذربايجانلي قوجالاردان بيري اسن اليله آغزينا “چپر” چکيب يانينداکينا پيچيلدادي: “پالتارينداکي شکله باخ – ايت باشينا اوخشايان ايشاره‌ني دئييرم – کؤپک اوشاقلاري بيزدن اوغورلاييب‌لار”. گنج‌لر آستا-آستا بير-بيريلرينه ياخينلاشيرديلار.
هامي‌صبيرسيزليکله غاليبي گؤرمک ايسته‌ييردي. مئيدانا توپلاشانلار قهرمانلاريني سسله‌ييرديلر: ائلجان! ائلجان! ائلجان! قارشي طرف ده عئيني تئمپ‌له قيشقيريردي: خانجان! خانجان! خانجان! سونرا آذربايجانلي گنج ائرمنييه وار گوجو ايله بير شاپالاق ووردو. و برکدن:
– “خوجالي” – دئدي.
ائرمني ايللردير بونا حاضيرميش کيمي‌بير ثانيه بئله گؤزله‌مه‌دن شيلله جاوابيني وئريب، – “پينديق” – دئيه قيشقيردي.
سونرا “ساناتورک”ه “هامازاسپ” جاواب وئردي، “آتاتروک”ه “زوري بالايان”. “آوو” قيشقيرديلار، “موباريز” آغلاديلار… سونرا بير آنليق سوسدولار. آذربايجانلي بير آز ياواشدان دئدي:
– دؤيوله‌سي چوخ شئييميز وار.
سينه-سينه‌يه دايانديلار، بئلجه بير-بيرلريني ايته له‌ديلر… ايته له‌ديلر… ايته له‌ديلر… ديز اوسته دوشدولر، ديز اوسته ايته‌لنديلر، ديزلري قانادي. ديرسک اوسته کلله‌لش‌ديلر، ديرسک‌لرينين دريسي قوپدو، يئري جيرماقلاديلار، ديرناقلاريندان اولدولار، گون باتدي، آذان سسلندي، گؤزلريندن ياش آخدي، قانلارينا قاريشدي، ايت‌لر اولاشدي آت‌لار کيشنه‌دي، آغري داغ آغري ايدي مهريني سالدي – اينسانلارين هيککه‌سي کئچمه‌دي. يئني دن سينه-سينه‌يه دوردولار، خيسين-خيسين آغلاديلار. عئيني ديلده آغلاييب عئيني ديلده سيزلاديلار. قول-بويون اولوب هؤنکوردولر. بو صحنه‌يه دؤزمه‌ين ناتوانين شوشاداکي هئيکه‌لينين گولـله دئشيک‌لريندن ياش گلدي. سونرا بعضي قادينلارين گؤزلري ياشاردي، گنج‌لر يئره باخدي، قوجالار ساققاليني قاشيدي، اوشاقلار پرت اولدو.
سونرا بير قوجا آياغا قالخيب ياواش-ياواش قاباغي گئتدي. ائرمني‌لردن کيميسه قارالاميشدي. کئشيکچي‌لر اونو ساخلاماق ايسته‌ينده کيشي الي ايله رد ايشاره‌سي وئريب – “آده، اليويزي چکين! بو قاينيم وارتاندي” ،آده، وارتان، سن ساغسان؟” – دئدي. اؤزونه اوخشايان بير ائرمنيني قوجاقلاييب ائرمنيجه آغلادي، “وئرا، آي قيز!هارداسان؟ وارتاني تاپميشام” – دئييب، آذربايجانجا هؤنکوردو.
اينسانلار بير-بيريلرينه قاريشديلار. سانکي بونلار باياقدان نيفرت‌له بير-بيريلريني سوزنلر دئييل! مئيداني گولمک، آغلاماق، قيشقيريق سسي بورودو.
آداملار بير-بيرينه قاريشيب هيجانلا دانيشيرديلار. گنج‌لر ائلجان‌لا خانجاني آتيب-توتوردو. سونرا اطرافي غريبه موسيقي سسي بورودو. اسرارانگيز سسين‌هانسي آلتدن چيخديغيني بيلمک اولموردو. ساري گلين دئييلدي. بلکه ده ساري گلين ايدي. قوجاغيمدان نه واخت دوشوب قاچديغينين فرقينه وارماديغيم باياق کي مکتبلي اليمي‌دارتدي:
– عمي، عمي، اوردا بير بالابان وار، بير طرفيني ائرمني پيله‌يير، بير طرفيني شيرزاد دايي. گل باخ!
اوشاغين آردينجا گئديرديم، کوره‌يينده‌کي چانتا بير جوت قانادا اوخشاييردي.
منبع :